11 polis kuhaa'g allowance

Gimando na ni Mayor Tomas Osmeña ang pagpakanselar sa tagsa ka libo nga incentive allowance nga gihatag sa siyudad matag bulan ngadto sa onse ka mga polis nga nadestino sa Tabo-an ug Carbon Police Station nga gi-reklamong kusog mangilkil ngadto sa ilang mga dinakpan bugti sa pag-areglo sa kaso.

Ang maong onse ka mga polis mao kini ang gibulgar kaniadto sa hepe sa Regional Intelligence and Investigation Division (RIID-7) Sr. Supt. Augusto Marquez nga mga mangilkilay nga polis diha sa Carbon ug Tabo-an.

Kini human pormal nga miluwat og mga pinanumpaang pamahayag ang mga nabiktima sa maong mga mangilkilay nga polis og gani mipasalig si Osmeña nga dili siya magpanagana nga mogastu ang siyudad bisan og moabot og tunga sa milyon ka pesos aron lang makonbikto ang maong mga polis.

Hinuon giklaro ni Osmeña nga walay mga opisyal sa maong duha ka police station ang nalambigit sa maong pasangil gumikan kay walay lig-ong ebidensya nga ilang nahipos batok sa hepe ug mga opisyal sa Carbon ug Tabo-an.

Ang mga polis nga gi-rekomendar nga pakuhaan og allowance ingon man pasakaan pa gyud og kaso gilangkuban nila ni SPO2 Eugenio Teves, SPO2 Abu Inane Babiera, SPO1 Elmer Abelgas, SPO1 Williard Solibio, PO3 Fernando Toledo, Rogelio Castaneda, PO3 Joseph Victorioso, P02 Mario Ariel Naton, PO2 Reynaldo Labatin ug Rodrigo Zalueta.