Si Natuel sa usa ka pakighinabi sa Banat News mibutyag nga usa sa mga nakaingon sa "failure" sa kapolisan mao ang kakulang sa modernong ekipos susama sa naa sa ubang kapolisan sa ubang nasud ug dili ang kakulang sa paglihok sa ilang trabaho isip mga polis.
Matud pa niya nga ang PNP nagsalig lang sa kaugalingong inisyatiba aron masulbad ang matag kasong isangon kanilang sulbaron bisan walay bag-ong kahimanan.
"Sa ato dinhi sa PNP wala ta nianang sophisticated nga mga kahimanan sa imbestigasyon compare sa ubang nasud nga bisan walay assistance sa community masulbad nila ang kaso," matud ni Natuel.
Niadtong milabay'ng gabii nadugang sa talaan sa gipangpatay sa gituohang mga sakop sa vigilante ang managtiayong Zacarias ug Esterlita Flores uban sa ilang drayber nga si Giovanni Jimenez diha sa dalan Magallanes sa barangay Ermita diin duha ka wala mailhing mga lalaking armado sa kalibre 45 ug 9 mm pistola ang mibanhig kanila.
Giingong si Esterlita dunay kasong pending diha sa korte gumikan sa ilegal nga drugas, apan buot pa kining kompirmahon sa Homicide Section. Si Supt. Pablo Labra sa pakighinabi sa mga tigbalita miangkong nadakpan na nila si Esterlita makadaghang higayon kaniadto apan kanunay'ng makapiyansa.
Gitumbok ni Natuel nga maong walay nasulbad sa 101 na karon ka kaso sa vigilante style killings dinhi sa Sugbo kini gumikan usab sa kakulang sa kooperasyon sa mga tawo nga posibleng motestigo.
Apan iyang gibutyag nga dili masigurong ang tanang 101 ka mga pagpatay binuhatan tanan sa vigilante. Matud pa niya posibleng dunay misuon sa estilo sa pagpatay sama sa paagi sa mga vigilante gumikan kay sobra kaayo kini kadaghan. Nagsugod ang vigilante style killings dinhi sa Sugbo niadtong Disyembre 22, 2004.-Edwin Ian Melecio