Money transfer sa Fuente gitulis: Kapolisan nagtuong gisungog sa mga tulisan

Kapolisan sa Cebu City Police Office daw gisungog og maayo sa grupo sa mga banggiitang tulisan nga Villanueva robbery group kini human laing money transfer nga sakop sa hurisdiksyon sa Fuente Police Station ang nabiktima na usab sa pagpanulis kagahapon sa udtong tutok.

Nabiktima sa tulis mao ang Western Union money transfer nga gi-operate sa Universal Storefront Services Corporation nga naa mahimutang sa gibana-banang 500 ka metros lamang gikan sa mismong police station diin nadala sa grupo mao ang P3,500 ug US$150.

Sumala pa sa imbestigasyon sa Criminal Investigation and Intelligence Branch pinanguluhan ni Supt. Pablo Labra ang kaherang si Janice Dahunan miila sa pictures nila ni Nando Abapo ug Renato Hermosilla.

Giingong si Abapo maoy nangutana kang Dahunan kung pilay mabayran kun magpadala og kwarta apan nianang tungora kalit nga misulod si Cardoza ug mideklarar og tulis dungan sa pagdis-arma sa gwardiyang si Samuel Lobiano sa iyang kalibre 38 rebolber.

"They are up to something.They are not up to the money kay kahibawo gud sila nga Sunday mingaw. Kaning ila pagsungog ra gyud ni nato aron makabawos sila after nadakpan si Peralta. Sige ila pa 'ron," matud pa ni Labra.

Samtang si Abapo nagbantay kang Dahunan ug si Cardoza kang Lobiano misulod si Hermosilla ug maoy midemanda kang Dahunan sa kwarta, human mahatag daling milakaw ang mga suspek paggawas ug wala igkita kun hain miadto.

Walay nakamatikod kung nagsakay ba og motorsiklo o ba kaha naglakaw ra ang grupo.

Pipila na ka semana ang nakalabay dunay laing grupong gitumbok ang kapolisan nga responsable sa pagpanulis sa pipila ka mga estabilisamento dinhi sa dakbayan ug kadaghanan niini gipasangil ngadto sa grupo ni Cardoza kun Villanueva.

Niadtong nakalabay'ng Oktobre 25 nasikop ang usa sa mga gisuspetsahang sakop sa grupo ni Cardoza nga si Randel Peralta didto sa Barili.

Nunot niini, si Labra sa pag-analesar sa insidente nagtuo nga dili kwarta ang tuyo ni Cardoza sa pagtulis kagahapon sanglit sayod kini nga Domingo ug minus kaayo ang kustomer anang adlawa .

Matud pa niya nga pagpanimawos ug paghatag og pakauwaw sa mga polis ang gihimo niini gumikan sa pagkadakop kang Peralta, si Peralta maoy gitumbok nga kauban ni Cardoza pagtulis sa manindahay og isda sa Pasil diha sa Capitol Site niadtong Oktobre 4 diin nakakuha sila og P70,000.

Si Villanueva ug mga kaubanan sumala pa sa CIIB mga kanhi mga sakop nila ni Danny Limotan ug Reyruth Roel Torres kinsa parehong nadakpan didto sa Mindanao ug gibalhog na sa Bagong Buhay Rehabilitation Center.