Mga nagtungha sa HS computer literate na

Hayag kaayo ang kaugmaon sa mga estudyante sa mga eskuylahang publiko karong gibansay na sila sa paggamit sa computer.

Mao kini ang gibutyag ni Josefina Ramos, regional coordinator sa Information Communication Technology (ICT) Center sa Department of Education (DepEd-7).

Matud pa ni Ramos nga kasagaran karon sa mga nagtungha sa high school, hanite na kaayo mogamit sa computer ug labing nakapagaan sa ilang pagtuon.

Ang ICT usa ka programa nga gilusad sa DepEd inabagan sa pribadong mga negosyante og computer machines aron paghatag og kasayon sa magtutudlo sa pagtudlo sa mga subject nga mathematics, english ug science.

Sa samang higayon nakahimo usab nga sayon alang sa mga estudyante ang pagkat-on sa mga subject nga nahisgotan tungod kay naa sa computer ang labing kompleto nga kasayoran bahin sa tanang background nga ilang gikinahanglan sa ilang leksiyon.

Alang kang Ramos nga mapahimuslan kaayo kini ilabi na sa mga kabos nga estudyante kinsa maglisod na sa pagtungha og upat o sobra pa nga tuig sa kurso sa kolehiyo.

Kay pinaagi sa pagkuha lang og tagduha ka tuig nga technical course sa kolehiyo aron dali lang makagraduwar ang estudyante ug dali rang makasulod og trabaho ilabi na nga hanite na siya mokupot sa computer.