Ang maong seminar ug mga pagbansaybansay ang gitumong alang sa paghatag kanila og tukmang kasayuran sa pag-andam sa kaso aron dili kini mabasura sa pagsang-at sa korte.
Si Cebu Provincial Police Director Vicente Loot ang nagpasiugda niini ug giabagan usab kini sa mga piskal dinhi sa lalawigan sa Sugbo.
Sa pagpakighinabi sa mga tigbalita kang Loot maoy iyang gipadayag nga ang kakuwang sa igong kasinatian sa mga imbestigador sa kapolisan sa pag-andam sa kaso maoy nag-unang hinungdan nga mabasura sa korte.
Ang dili lig-on nga pagpresentar sa mga ebidensiya ug ang dili lig-ong basehanan sa mga pinirmahang pamahayag sa mga saksi maoy sagad gayod nga hinungdan nga ang korte mobasura sa kaso nga ipasaka sa kapolisan ngadto kanila.
Matud pa ni Loot nga ang usa ka adlaw nga seminar ug pagbansaybansay sa mga hepe ug mga imbestigador sa kapolisan ang giabagan usab kini ni Gobernador Gwendolyn Garcia.
Ang pag-abag ni Garcia ang natigayon pinaagi sa paghatag og pinansiyal nga tabang alang sa galastohan sa maong kalihokan ug ingon man ang paghatag og hamugaway nga lugar nga maoy gipahigayonan sa maong seminar ug mga pagbansaybansay.