Hotlogs nasakmit sa SOG

Mga gidudahang ilegal nga mga kahoy nga gipayuhot gikan sa Surigao del Sur nasikop sa mga sakop sa Special Operations Group sa Provincial Police Office kagahapon sa kaadlawon diha sa barangay San Isidro sa dakbayan sa Talisay.

Si Chief Inspector Juanito Enguerra sa SOG misakmit sa PUJ nga gimaneho ni Raul Perino, 36, barangay Basak ning dakbayan sa Sugbo ug mga kaubanan niini nga sila si Bryan Llaban,25, taga barangay Quiot ning dakbayan ug Roger Abapo taga San Isidro Talisay.

Si Enguera mitug-an nga gikan sa San Miguel Surigao del Sur ang gibana-banang 100 board feet nga kahoy nga yakal nga nagkantidad og P40,000 nga dad-on unta sa Inayawan ning dakbayan sa Sugbo.

Giingong si Abapo higala sa usa ka Noel Abay nga taga Inayawan ug maoy nagsilbeng guide ni Perino nga iyang gisuhulang mohatud sa kahoy diha sa Inayawan.

Matud pa ni Enguera ang maong kahoy gipanag-iya sa usa ka Maria Alimbuyong nga taga San Miguel Surigao Sur ug duna kini permisong putlon apan walay permisong ibiyahe.

Ang maong operasyon kabahin pa sa naunang malampusong operasyon niadtong milabay'ng semana diin duha ka polis sa Liloan ang nabutang karon sa imbestigasyon gumikan sa pagpalusot sa ilegal nga kahoy.