Amahang hubog "ni-hostage" sa anak

Hubog nga amahan migamit sa iyang tulo palang ka semana nga anak nga babaye isip taming susamang "gi-hostage" aron dili siya dakpon sa mga polis human gialarma sa kapolisan diha sa St. Jude barangay Bulacao ning dakbayan kagahapon sa hapon.

Apan ang suspek nga si Vicente Gaviola,33, molupyo sa maong dapit nabalhog gihapon sa kapolisan human madala sa hilot sa mabugnaw'ng negosasyon sa kapolisan ug mga kabanay niini.

Dili momenus lima ka mga sakop sa Crime Supression Unit ug Mobile Patrol Group ug mga sakop sa Pardo Police pinanguluhan ni Chief Insp. Alexis Relado ang miresponde sa maong alarma.

Sumala pa ni Relado sa Banat News nakurat pa ang kapuyo sa suspek nga si Jonalyn dihang nangabot sila (mga polis) kay matud pa niya nga away kadto sa magtiayon.

Diha nalang niya nasayran nga ang mitawag sa mga polis mao ang inahan sa iyang kapuyo nga si Freda kinsa giingong hubog usab niadtong tungura ug gialibadbaran sa panag-away sa managtiayon.

Hinuon walay nangasakitan sa kaguliyang ug walay hinagiban nga nakuha gikan sa suspek, luwas na usab ang bata apan alang sa seguridad sa tanan si Vicente gipakatulog sa karsel sa Pardo Police hangtud karong adlawa sanglit wala may mosang-at og kaso batok kaniya.