Puya nakit-an sa IT park

Usa ka gibana-banang lima ka buwang fetus ang nakaingon sa pagbara sa usa ka tubong agianag hugaw sa tawo ang nakaplagan sa mga tubero diha sa PIPC 11 Building sa Asia Town Information Technology Park kagahapon sa kaadlawon.

Si PO3 Robert Escarlan sa pakighinabi sa Banat News mibutyag nga mireklamo sa sayo pa ang mga kawani sa maong edipisyo gumikan sa pagbara sa ilang kasilyas.

Nunot niini ang supervisor sa maintenance department sa maong edipisyo nga si Ronie Soya mimando nila ni Carlos Cobarde ug Edgardo Pelago sa pagsubay sa mga tubo niini.

Tuod man dihang nahabwa ang usa sa mga pipelines ilang nadiskubrehan ang maong fetus nga usa ka lalaki, dali nila kining gidala sa ilang buhatan ug mitawag sa kapolisan.

Gisusi na karon sa Homicide Section kung si kinsa ang posibleng inahan sa maong fetus nga gituohang gituyo sa walay puangod nga inahang mi-flushed sa iyang anak susama lang sa iyang hugaw diha sa kasilyas.