Si Inspector Mario Monilar ang hepe sa Homicide Section sa pakighinabi sa Banat News nagkanayon nga dili masalikway nga posibleng vigilante ang mitira kang Arvin Sentino Rusel, 22, taga Villagonzalo 2 barangay Tejero ning dakbayan.
Nasayran gikan kang SPO2 Zenaido Pastorfide nga si Sentino dunay kasong marijuana ug paghupot og armas niadtong 2001ug nasulod kini sa Bagong Buhay Rehabilitation Center.
Sagad nga target sa mga vigilante nga nagsugod kaniadtong Disyembre 22,2004 mga ex-convict man ug kadtong mga badlungon sa katilingban.
Samtang gibutyag ni Monilar nga posibleng dunay relasyon si Sentino niadtong tulisang napatay ni SPO1 Adonis Dumpit kaniadto.
Apan usa sa subayon sa kapolisan gawas sa vigilante mao ang posibilidad nga dunay nagdumot sa biktima ug posibleng gipanimaslan kini.
Sa pagkakaron nag-atubang pa karon sa blangkong bungbong ang Homicide Section sanglit wala pay nangursunadang motestigo sa insidente sumala pa ni Monilar.
Si Sentino maoy ika-98 nga biktima sa vigilante style killing dinhi sa dakbayan sa Sugbo nga wala pa masulbad sa kapolisan hangtud ning mga panahuna.