22 anyos giulo pagpusil

Usa ka lalaki gipusil sa ulo samtang naninda og lubi diha sa Unit 3 Carbon Market barangay Ermita ning dakbayan kagahapon sa udto.

Ang biktima giilang si Arvin Centeno Rusel, 22, taga Villagonzalo 2 barangay Tejero ning dakbayan. Samtang wala pay matumbok ang kapolisan sa kung si kinsa ang nag-inusarang suspek.

Si SPO2 Zenaido Pastorfide sa Homicide Section mitug-an sa Banat News nga kasamtangang naglakaw ang biktima diha sa eskina sa F.Gonzales ug M.C.Briones dihang kalit nga gipusil sa wala mailhing tawo.

Ang inahan sa biktima nga si Rebecca matud pa ni Pastorfide nagkanayon maoy motabang sa pagpaninda og lubi ingon man dahon sa saging ang iyang anak ug padulong na unta kini sa ilang tindahan.

Gibutyag sa inahan sa biktima ngadto ni Pastorfide nga napriso na kaniadto ang iyang anak gumikan sa kasong paghupot og kutsilyo ug marijuana niadtong 2001.

Daling gidala sa iyang mga igsuon ang biktima ngadto sa Cebu City Medical Center. Samtang gisusi pa karon sa Homicide Section nag relasyon ni Centeno sa gidudahang kawatan nga si Raffy Centeno Rusel nga napatay sa kapolisan pipila na ka tuig ang milabay.

Samtang sa laing bahin usa ka Manuel Cebes,18, tinun-an sa high school ang naalaang sakop sa Bloodz gang ug gipusil sa duha ka silingang sakop sa Crips gang diha sa dalan P.del Rosario extension barangay Sambag 1 ning dakbayan kagahapon sa hapon.

Si Cebes gikatahong nanguryuso sa nanaglalis diha sa gawas apan gisugat nalang nila ni Aldos Regada ug Gene Flores dayong gipusil diha sa iyang walang tiil. Ang biktima daling gidala sa CCMC samtang nakaikyas ang mga suspek.