Desenyo Sa Talisay City Hall Gidayeg

Ang katahom sa pagkadesinyo sa City Hall sa Talisay City nagumikan sa abag sa maayong pangarte ni Ginang Norma Ming-Ming Gullas.

Matud pa ni city administrator Aurora Econg nga daku kaayo og tampo si Mrs. Gullas, kapikas ni Kongresista Eduardo Gullas sa architectural design sa maong edipisyo.

Gani matud pa ni Econg nga sa tibuok rehiyon-7 wala siya kakita og susamang desinyo sa Talisay City Hall.

Bisan sa tibuok nasud, lisud kaayong ikatandi ang kamadasigon ug kamadanihon tan-awon sa maong lingkoranan sa panggobiyerno sa Talisay.

Matud pa ni Econg nga nasayran niya nga misalmot si Mrs. Gullas sa pag-aninaw sa mga maayong porma ug hitsura sa maong edipisyo.

Kini sa dihang gilakip pa ang mga plano sa arkitekto niini.

Matud pa ni Econg nga suwerte kaayo ang taga Talisay tungod kay bisan ang taga Manila, bilib kaayo ning pagka-desinyo sa ilang city hall.

Bisan si kinsa dili pul-an magsud-ong sa maong edipisyo ug labaw sa tanan kun makatunob na sa sulod niini, miingon si Econg.

Ang maong city hall natukod niadtong panahon nga si Gullas pay mayor sa siyudad nga gigastohan og P121 milyones.