Gidunggab sa kainom

Anaa karon sa kritikal nga kahimtang sa tambalanan ang usa ka tawo kinsa gidunggab sa gikainom niining silingan niadtong miaging gabii didto sa barangay Guizo, siyudad sa Mandaue.

Ang biktima mao si Jaime Vicente, 35 anyos, minyo nga nagpuyo sa nahisgotang dapit. Si Jonathan Flores, 21 anyos, ulitawo nga silingan usab niini maoy gitumbok nga nagdunggab sa biktima kinsa nadakpan usab sa kapolisan ug gibalhog sa bilanggoan.

Sa pagpakighinabi kang PO3 Miguel Estrada sa Presinto 1 sa dakbayan sa Mandaue nahibaw-an nga nag-inom ang biktima ug ang suspetsado uban sa pipila niini ka mga silingan sa maong dapit.

Dihang nangahubog na naglalis ang duha hangtod nga nakakuha og kutsilyo ang suspetsado ug gihansakan ang kalawasan sa biktima sa makadaghang higayon.

Dali nga gihatod ang biktima sa Cortes General Hospital sa dakbayan sa Mandaue ug gibalhin kini ngadto sa Vicente Sotto Memorial Medical Center (VSMMC) sa dakbayan sa Sugbo.