Inom, sugal, saba-saba idili sa mga sam-ang

Hugtanong ipatuman sa kagamhanan sa siyudad sa Sugbo ang pagdili sa pag-inom inom, sugal ug pagsabasaba sa tanang mga sam-ang dinhi sa dakbayan atol sa pag-obserbar sa kalag kalag karung petsa uno ug dos sa Nobiyembre sunod semana.

Kini maoy sentro sa gituki atol sa final meeting nga gipatawag ni bise Mayor Michael Rama kagahapon sa buntag nga nangandam na sa paglusad sa Oplan Kalag-kalag.

Apil sa gipatawag sa maong tigum kagahapon mao ang mga barangay kapitan sa mga urban barangays ilabi na kadtong dunay mga sam-ang sa ilang lugar ug mga sikbit nga barangay aron magkahiusa kini pagpakatap ug mga tanod sa mga sam-ang aron masiguro ang kahusay ug kalinaw.

Gipatambong sab sa maong tigum ang mga representante gikan sa Parish Security Council (PSC) aron mapahimangnuan usab sa paglig-on sa seguridad sa tanang mga simbahan nga malikay gikan sa mga huhungihong nga hulga sa pagpamomba.

Ang kapolisan gimanduan usab nga mopakatap sa ilang mga personnel sugod sa petsa 31 diha sa nagkalain laing sam-ang hangtud na sa petsa dos sa tungang gabii.

Ang Citom maoy gitahasan pagpatunhay sa trapiko aron masiguro nga walay mo-abuso sama sa pagpataka lang ug parking ug ang Department of Public Services (DPS) maoy gitahasan paghipos sa mga basura.

Matud ni Rama gikasabutan sab nila nga i-tap sa maong okasyon ang mga taga SPEED ug mga anti crime group.

Nunot niini, gipasidan-an sab sa bise mayor ang publiko ingon man kadtong mga nanag-iya og establisamento sama sa pawnshop, convenience store ug uban pa nga mobukas sa maong adlaw nga dili kini mo-kompyansa paglikay sa mga pagpangawat og lungkab niining higayuna.

Samtang ang mga konsehal sa dakbayan boluntaryo usab kining mangunay sa pagbisita sa nagkalainlaing mga sam-ang aron pag-monitor sa sitwasyon niini gawas lang nila ni Konsehal Cristopher Alix nga atua sa abroad ug Rodrigo Abellanosa nga nagbakasyon pa.