Biktima sa tulis mireklamo kay walay polis

Talisaynon kinsa biktima sa tulis miduso og reklamo batok sa kapolisan sa Talisay ngadto sa buhatan ni Bise Mayor Aberdovey Belleza tsirman sa kahapsay ug kalinaw sa siyudad niadtong Lunes.

Si Jackelyn Apog residente sa Tierra Grande, Camella Homes barangay Lawaan dakbayan sa Talisay mireklamo nga walay mga polis nga mitabang o miresponde dihang siya ug ang iyang mga kauban nga pasahero sa multicab gitulis sa tulo ka tawo ug nakuha ang ilang pitaka ug mga cellphone. Nahitabo kini niadtong miaging adlaw diha sa barangay Bulacao, Talisay.

Matud pa ni Apog nga wala silay nakit-ang mga polis o outpost sa polis sa maong lugar nga para unta mapangayoan og tabang.

Si Apog nagkanayon nga kuyanap kaayo karon ang insidente sa hold-up sa Talisay diin kasagaran mahitabo ang maong insidente diha sa barangay Linao hangtud na didto sa Bulacao.

Si P/Supt Audie Villacin hepe sa kapolisan sa Talisay nagkanayon nga ang pagpanulis nga panghitabo sa siyudad maoy usa sa ilang prayoridad sa kapolisan sa dakbayan.

Nangangkon si Villacin nga ang alert team sa kapolisan mag-postehan diha sa barangay Linao ug magpahigayon og check points kada-adlaw.