Task force bird flu nagtagbo

Nagtagbo na kagahapon ang mga sakop sa Task Force bird flu nga giumol ni mayor Tomas Osmeña aron mohimo og mga lakang pagpangandam batuk sa sakit nga bird flu nga dili makasulod dinhi sa dakbayan sa Sugbo.

Si Dr. Nestor Alonso II nga maoy nangulo sa maong task force nipatawag sa maong meeting sa buhatan ni Konsehal Gerardo Carillo aron kasugdan nila ang mga lakang nga himoon.

Usa sa nahisgutan nila sa maong tigum mao ang pag-monitor sa mga dagsa nga langgam nga moabot dinhi sa siyudad gikan sa lainlaing lugar aron dayon kini mahimoan og pakisusi.

Gani giawhag ni Dr. Alonso ang publiko nga mo-report dayun o ba kaha mo-text sa 09173246773 kon duna kini makit-an nga langgam nga moabot dinhi sa dakbayan.

Kini human gi-report sa City Veterinary Office pinangulohan ni Dra. Alice Utlang nga dunay mga migratory birds ang magduawan diha sa Pond A ug Pond B sa SRP nga piligrong nagdala sa sakit nga bird flu nga motakod ngadto sa mga manok ug ubang poultry products ug ngadto na sa tawo.

Matud ni Alonso gihingusgan karon nila ang pag-monitor sa mga langgam ug manok gumikan kay matag adlaw halos dul-an sa usa ug tunga ka milyon ka mga manok ang moagi sa siyudad paingon sa Mandaue ug ubang dapit pagtubag sa adlaw adlawng panginahanglan.

Matud ni Alonso nga sentro sa gituki nila sa maong tigum nga ma-deklarar na ubos sa state of emergency ang dakbayan aron mapagawas dayun ang pundo nga P10 milyones alang sa mga gastuhan sa himuong pagpangandam batok sa bird flu.