Tomas supak sa snap election

Dakong supak si Mayor Tomas Osmeña niining sugyot ni Senador Sergio Osmeña III ngadto sa Kongreso pag-amendar sa Konstitusyon aron mapahigayon ang snap election.

Si Osmeña maoy miduso niini human sa natigayon nga pakigtagbo nila ni Arsobispo Recardo Cardinal Vidal ug El Shaddai Leader Mike Velarde ngadto sa dili mominos siyam ka mga inilang magpapatigayon dinhi sa nasud nga maoy naglaraw ning pagpasiugda og snap election.

Kini gitumong aron matubag ang tanang mga nasinati nga suliran dinhi sa nasud ilabi na gyud ang nagpadayong krisis sa politika batok sa administrasyon ni Presidente Gloria Arroyo.

Apan alang kang Osmeña nga igsuon sa senador wala nakinahanglana pa ang pagpatawag sa maong snap election gumikan kay sigurado nang daog sa milabay'ng 2004 presidential election si Presidente Arroyo.

Wala hinuon hatagi og importansiya sa mayor ang nagpadayong kagubot sa politika didto sa kaulohan nunot ning walay hunong nga mga lihok protesta gumikan kay alang niya ang mga sakop sa media lang sa kaulohan maoy nagpadako niini.

Gibasihan sa mayor mao ang padayong paglambo sa ekonomiya sa nasud apil na ang mga export products taliwala ning giatubang karon nga krisis sa kasamtangang administrasyon.

Nasayran nga si Osmeña loyal kini sa administrasyong Arroyo ug usa kini sa nakahatag og mayoriya sa milabay'ng pinili-ay.