M'baling access road buksan na

Ablihan na sa publiko pipila ka semana gikan karon ang Mambaling Access Road nga nagdugtong sa South Coastal Road sa South Reclamation Project (SRP).

Tumong ug tuyo sa pagahimuong pagbukas niini aron maminusan ang suliran sa trapiko ilabi na sa dakbayan sa Sugbo ilabi na gyud ang habig sa may habagatang bahin sa siyudad.

Apan gi-klaru ni mayor Tomas Osmeña nga kadto lang mga sakyanan ug indibidwal nga na-isyohan og SRP pass sa City Hall ang iyang tugutang makaagi sa maong lugar ug kini dili apektado sa giluwatang kamanduan sa korte nga nagpaabli sa hingpit sa South Coastal Road ngadto sa mga motorista gumikan kay gipanag-iya sa siyudad ang maong agi-anan.

Kini maoy hinungdan nga gipadayon gihapon ni Osmeña ang pagpamirma sa mga miaplay og SRP pass bisan og abli na sa hingpit ang South Coastal Road ug pagkakarun mokabat na sa 30 mil ka passes ang na-aprobahan sa siyudad.

Matud sa mayor kinse ka tuig niyang gitun-an ang pag-abli sa Mambaling Road nga maghatag og kasayon sa biyahe nga dili na mahasol sa trapiko ang mga molupyo sa Labangon, Punta Princesa, Calamba, Pardo ug mga kasilinganang lugar kun mopaingon kini sa City Hall ug Fuente Osmeña.

Kini gumikan kay molanat na lang unya ngadto sa 10 minutos ang biyahe sa mga molupyo sa maong lugar nga dunay kaugalingong sakyanan nga anha nalang moagi sa Mambaling road dayong mosubay sa South Coastal Road ug direkta nang molusot sa Aduana habig sa City Hall.

Pagkakaron kumpleto na ang pagbukas sa maong agi-anan ug ang pag-aspalto nalang ang gitiwas niini karon ug human unya niana hingpit na kining ablihan sa publiko.