9 Ka Badlungong Polis Girelibohan

Gumikan sa mga kontrobersya nga gikalambigitan sa iyang mga sakop gihurot og parelibo ni Cebu Provincial Police Office Director Vicente Loot ang siyam niya ka mga polis.

Ang gipangrelibuhan giilang sila si Sr.Insp. Claro Benatiro, PO2 Anthony Aguisanda, PO1 Julius Patac, SPO1 Ricardo Ermac, PO3 Ernesto Pepito, PO1 Dennis Malinao ug PO3 Marcelo Cometa samtang ang ika-walong gireklamo nga si PO2 Rodilo Pilapil wa apila sa girelibuhan gumikan sa rason nga menus kaayo ang partisipasyon niini sa pasangil sanglit igo lang siya miapil sa pag-aresto kang Hiram Godinez.

Si Mary Ann Flores Deniega ang uyab sa dinakpang si Godinez nadakpan sa grupo nila ni Aguisanda niadtong Oktubre 7, 2005 diha sa barangay Tilhaong lungsod sa Consolacion.

Mipasangil si Deniega nga gipagawas siya ni Aguisanda bugti sa bayad nga P70,000 samtang gipaubsan ang drug pushing ngadto sa drug possession, apan wala pa matagbaw giingong gipangayuan pa sila og laing P120,000 ni Malinao isip piyansa ni Godinez sa kasong drug possession nga nadiskubrehan ni Deniega nga P50,000 ra diay ang gipangayo sa korte nagduda siyang gibulsa ni Malinao ang P50,000.

Human niadto gikatahong gipangayuan na usab sila ni Aguisanda og P10,000 aron iuli ang motorsiklong may plakang 7D-0596 nga hinulman sa mga suspek sa usa ka Estrella Tabanag nga lakip sa gisakmit atol sa pagdakop.

Nunot niini mireklamo si Deniega ngadto sa National Bureau of Investigation hinungdan sa pagkasikop ni Jerry Perez ug lain pang kauban niini nga mitug-ang gisugo sila ni Aguisanda aron kuhaon ang P10,000 nga panglukat sa motorsiklo.

Ang walo gipasakaan og reklamo ngadto sa buhatan sa Ombudsman for the Visayas kagahapon gumikan sa salang robbery extortion nga kalapasan sa Anti - Graft and Corrupt Practices Act of the Philippines ug ingon man kasong administratibang Grave Misconduct.

Samtang ang laing duha ka polis nga giparelibuhan mao sila si SPO4 Roy Balila ug PO3 Dario Baguio sakop sa Liloan Police ug Regional Mobile Group ang duha gipresentar kagahapon ni Loot ngadto kang Gob. Gwendolyn Garcia.

Ang duha nalambigit sa pagpayuhot og kahoy diha sa barangay Calero sa lungsod sa Liloan niadtong nakalabay'ng Oktobre 22.