PRESYO SA LPG MIPASAKA

Mipatuman na usab og laing pagpausbaw nga sengkuwenta sentabos sa matag litro sa gasolina, krudo ug kerosene ang Pilipinas Shell sa miaging tungang gabii.

Gipaabot nga magsunod usab niini ang uban pang kompaniya sa produktong petrolyo isip sa pagtuman sa mga nahaunang taho nga may mga pagpausbaw sa presyo sa matag litro ning mosunod nga semana.

Ang Liquified Petroleum Product (LPG) sa Filipina Shell ang giusbawan usab og sengkuwenta sentabos ang matag kilo niini.

Ang gipaabot nga mosunod usab niining semanaha ang Petron Petroluem Corporation, Caltex Philippines, Flying V, Uni Oil ug uban pa.

Ang nagpadayon nga pag-usbaw sa presyo sa matag baril sa produktong petrolyo sa world market mao gihapon ang mga gipangatarungan sa maong pagpausbaw.

Si Energy Secretary Rafael Lotilla sa iyang pagpasabot ngadto sa mga tigbalita miingon nga 6 porsiyento lang ang usbaw sa import duty sa produktong petrolyo.

Kini sukwahi sa gikataho nga 10 porsiyento ang pagpausbaw niini nga magsugod sa pag-epekto sa pagpatuman usab Expanded Value Added Tax ( E-VAT) sugod karong Nobyimbre 1 niining tuiga.