2 patay sud sa 9 ka oras

Duha ang patay sulod sa siyam ka oras nga gintang dinhi sa dakbayan sa Sugbo gikan sa managlahing insidente sa pagpamusil ug pagpanunggab niadtong milabay'ng gabii ug kagahapon.

Sa unang insidente napatay sa wala pa mailhing suspek ang biktimang si Mariano Gabutin, hingkod ang panuigon taga Barangay Tagbao ning dakbayan.

Sumala pa sa mga imbestigador sa Homicide Section ang biktima kasamtangang naglingkod diha sa lantay sa balay sa iyang silingan dihang kalit lang kining gipusil sa wala pa mailhing suspek.

Dihang gisusi sa tagbalay nga si Roger Supilan nakaangkon na og daghang samad pinusilan ang biktima diha sa iyang tiyan, bukton ug bitiis daling gisalikway sa Homicide Section nga binuhatan kini sa vigilante .

Apan gibutyag sa Homicide Section nga 'trouble maker' sa maong dapit ang biktima ug posibleng gipanimaslan kini.

Samtang pagka kaadlawon kagahapon usa ka 17 anyos ang gidunggab samtang kini nagsayaw diha usa ka baylihan sa Sitio Magtalisay barangay Mabolo ning dakbayan.

Ang namatay mao si Gabmelito Morallos samtang ang gitumbok nga midunggab kaniya mao si Sherwin Maraba, 34, anyos molupyo sa maong lugar.

Sumala pa sa Homicide Section si Maraba nasuya sa sinayawan sa biktima ug gumikan niini kalit nga gihansakan sa suspek ang likod sa bata apan namatay gyud kini dihang nadala sa Vicente Sotto Memorial Medical Center.

Matud pa sa kapolisan nga duna nay gidunggab kaniadto ang suspek apan wala gyud kini madakpi sanglit kanunay ra niyang maruan ang mga polis kun siya susihon sa maong dapit.