Pangilkil sa 2 polis susihon

Mohimo karon og kaugalingong imbestigasyon si Cebu Provincial Police Office director Supt. Vicente Loot kalabot sa gikalambigitang kontrobersya ni Consolacion police chief Sr.Insp. Claro Binatero ug sakop niini nga si PO2 Anthony Aguisanda kabahin sa pagpangilkil.

Si Loot mibutyag sa mga sakop sa media kagahapon nga miangkon si Benatiro nga siya mao ang "chief" nga gipasabot sa namasangil nga si Mary Ann Flores kinsa giingong uyab sa ilang dinakpan nga si Ramil Godines.

Uban ni Benatiro mao si Aguisanda apan gipanghimakak niini ang pasangil nga duna silay kuhaunong "suborno" kang Flores. Sumala pa ni Benatiro igo lang gyud siya mi-verify sa impormasyong sa gi-surveillance sa grupo ni Aguisanda diha sa may botika sa Barangay Consolacion Cansaga sa naasoyng lungsod.

Nahibulong na lang si Benatiro dihang kalit nga miduol si Flores nga iyang namay-ungang uyab ni Godinez hinungdan nga mimando nalang siya sa pagbalik sa ilang buhatan kay "nasunog"na ang ilang surveillance.

Matud pa sa report human makabalik sa iyang buhatan si Benatiro duna siyay gisugo sa pagsusi og balik didto sa lugar apan wala na kini makabalik kay nasikop kini sa National Bureau of Investigation.

Giingong si Godinez nadakpan sa grupo ni Aguisanda niadtong Oktubre 7 sa kasong pagpayuhot og drogas apan mipasangil kining ang "drug pushing" nga kaso gihimo na lang kining drug possesion bugti sa P70 mil aron kini makapiyansa, apan dihang ila na untang bawion ang ilang motorsiklo midumili si Aguisanda ug nangayo na usab og laing P10 mil.

Nunot niini ilang gisumbong sa NBI ang kaso hinungdan sa entrapment operation apan si Benatiro ug Aguisanda wala masipong kun dili ang duha ka mga sakop nilang si Dennis Pepito ug Dennis Malinao.

Si Loot sa iyang bahin nagkanayon nga ang NBI na ang bahalang mosang-at sa kasong kriminal ug administratiba samtang siya mohimo sa imbestigasyon sa operational aspect kun duna bay kamatuoran ang pangangkon ni Benatiro. Plano usab niyang parelibohan ang duha kun motumaw nga naapektahan ang imbestigasyon.