Bata nahu'g sa payag naanod sa dagat

Patay nang nahaw-as gikan sa dagat ang usa ka tuig nga batang babaye kinsa nawagtang sukad pa niadtong Huwebes sa kaadlawon diha sa kadagatan sa lungsod sa Minglanilla kagahapon sa buntag.

Ang lawas sa bata naanod gikan pa sa Sitio Litmon, utlanan sa barangay Poblacion ug Dumlog sa dakbayan sa Talisay ngadto sa kadagatan sa barangay Tungkop lungsod sa Minglanilla tulo ka kilometro ang gilay-on gikan sa ilang lugar.

Giila ang biktima mao si Jean Villegas, anak nila ni Julieto ug Belinda Villegas kinsa nagpuyo sa usa ka gamay'ng barong-barong diha sa lapyahan sa dagat nga kun motaas ang dagat moabot diha sa ilang silong ang tubig.

Sumala pa sa ginikanan sa bata nga tupad lang silang nangatulog diha sa ilang payag apan pagkakadlawon nalisang si Belinda dihang wala na diha ang iyang anak sa higdaanan.

Pagsusi diha sa silong hunas na ang dagat apan wala kini sa ubos sa pagtuong diha ra kini nahagbong. Nagtuo silang atol sa ilang pagkatulog nahagbong ang bata gumikan kay gitaptapan lang og mga sako ug mga panapton ang ilang bungbong.

Ang bata nahaw-as sa grupo sa Talisay City Fishermen Sea and Ecological Care pinanguluhan ni Ulysses Fernandez human sila makadawat og impormasyon nga dunay nakaplagang patayng lawas sa maong kadagatan.

Ang mga ginikanan sa bata kasamtangang giabagan sa kagamhanan sa Talisay alang sa pagpahimutang sa biktima.