Ang nasud sa Japan pinaagi sa Japan Tokyo Metropolitan Fire Department sa pagpaningkamot ni Yoshiyuki Kurata sa Borderless Relief Activities Support Commission, maoy mitugyan sa maong fire truck nga mokantidad ngadto sa P7 ngadto sa 8 milyones pesos ngadto sa City Hall.
Sila si Konsehal Procopio Fernandez tsirman sa committee on police fire and penology ug City Fire Marshal Supt. Esmael Codilla maoy nihiling sa pag-presentar sa maong fire truck sa City Hall kagahapon sa buntag.
Hinuon karon pang Lunes himoon ang pormal nga turn over sa firetruck ngadto sa kagamhanan sa dakbayan.
Matud ni Fernandez dako kaayo og ikatabang sa kabomberohan ang maong fire trucks gumikan kay makatabang kini pagsulbad sa kakuwang sa firetruck sa Cebu City Fire Department.
Gibutyag sa konsehal ang asawa ni Kurata nga usa ka Sugboanon nga si Janeth nga pag-umangkon ni Codilla maoy miasikaso aron matigayon ang pag-donar sa maong firetruck dinhi sa dakbayan.
Gipadayag ni Codilla nga pagkakarun duna lay walo ka mga firetruck sa City Fire Department ang nagdagan, tulo ang padayon pang giayo ug area lader ingon man lighting tower.
Matod ni Codilla ang bag-ong gi-donar nga firetrucks mokarga kini ug usa ka libo ka litros nga tubig nga magamit og responde panahon nga dunay motumaw nga alarma sa sunog.