Iglesia papilion ombud sa CH

Nakahukom si Mayor Tomas Osmeña karong bag-o nga ihatag nalang ngadto sa relihiyosong pundok nga Iglesia ni Cristo ang pagrekomendar sa ilang mga sakop nga itudlo pagka resident ombudsman sa siyudad sa Sugbo.

Nakab-ot ang maong desisyon sa mayor gumikan sa paglangaylangay sa militanting pundok nga Akbayan pag-rekomendar og ilang miyembro aron mao untay itudlo sa maong bakanting posisyon.

Gipasabot ni Osmeña nga nakab-ot niya ang maong desisyon gumikan usab kay haum kaayo ang maong relihiyosong pundok sa maong posisyon ilabi na kay mga Katoliko ang mga badlongong kawani sa siyudad.

Giangkon usab sa mayor nga dako ang iyang pagsalig sa maong relihiyosong pundok bisan wala kini mobotar kaniya niadtong milabay'ng eleksiyon.