Gubat sa gov't vs simbahan gihimakak sa Malacañang

Gipanghimakak sa Malacañang nga dunay nag-umidong gubat tali sa gobiyerno ug simbahan gumikan niining mga kagubot sa kadalanan nga diin pipila sa mga relihiyosong pundok nangapil na sa pagmartsa uban sa mga raliyista nga gipasangil karon sa mga kaalyado sa administrasyon nga "nagtakuban"pinaagi sa prayer rally.

Kini bisan sa mga pagsaway nga gibato karon diha sa administrasyon ni Presidente Gloria Arroyo gumikan usab sa labing ulahing insidente sa kagubot tali sa kapolisan batok sa mga raliyista nga giubanan sa kaparian ug kanhi Bise Presidente Teofisto Guingona, Senador Jamby Madrigal ug Kongresista Satur Ocampo diha sa Plaza Miranda.

Si Presidential Spokesman Ignacio Bunye mipadayag nga bisan pa man sa pagsaway sa gipatumang calibrated preemptive response (CPR) sa Malacañang ipadayon gihapon ang pagpatuman sa balaod alang sa kahapsay lakip na niini ang pagpakgang sa mga raliyista.

Mipasangil si Bunye nga dunay pipila ka mga obispo sa simbahan nga walay gusto kang Arroyo ang nagduhig sa simbahan nga maapil sa kaguliyang ug karon gisakyan usab sa mga politikong dunay kaugalingong ambisyon nga mihimo usab sa susama sa gibuhat sa mga kritikong obispo.

Ang mga kaalyado ni Arroyo miangkon nga mahimo gyung malikayan ang nahitabo niadtong Biyernes kun wala lang hagita sa mga raliyista ang mga polis ug kun misunod pa sila sa mga patakaran nga angay'ng sundon.

Sumala pa sa mga naunang report ang prayer rally niadtong Biyernes wala hilabti sa kapolisan samtang kini gipahigayon diha sa usa ka simbahan apan giingong human ang pag-ampo hinay-hinay nga sekretong milusot sa dalan San Sebastian ang mga raliyista nga lahos padulong didto sa Malacañang hinungdan sa insidente sa paggamit og tubig sa kapolisan.