Fixers sa LTO nangwarta ra

Usa sa mga tag-iya og drug testing center sa dakbayan sa Mandaue mireklamo sa grabe na gayud kaayo nga kalihukan sa mga fixer nga naglihok karon diha sa Land Transportation Office sa dakbayan sa Mandaue.

Si Dr. Danilo Dionson, tag-iya sa Dionson Medical and Drug Test Clinic miingon nga ang kadaghanan sa mga fixer nga naglihok diha karon sa buhatan sa LTO nag-abuso na gayud kaayo.

Matud pa ni Dionson nga sila nga tag-iya og mga drug testing center maoy gihimong gatasan sa pipila niini.

Hinuon giangkon ni Dionson nga sa miaging mga buwan usa usab siya sa migamit sa mga fixer nga maoy muagni sa mga kustomer nga adto magpaubos sa drug test sa iyang klinika.

Gitataw hinoon niya nga ang iyang paghatag og pahalipay ngadto kanila human usab nila makita nga nakatabang usab sila sa iyang negosyo.

Apan matud pa ni Dionson nga karong bag-o iyang nakita nga dakong sayop ang iyang gibuhat.

Kini human usab niya makita nga siya gihimo lamang nila nga gatasan.

Gumikan niini adunay uban kanila nga mihimo pagdaot sa iyang klinika.

Gani adunay mga higayon nga adunay mga kustomer nga ilang ingnon nga adto sa lain gumikan kay siya walay lisenya.

Gawas niini kuhaan pa gayud og dugo kadtong anha magpa ubos sa drug test kaniya.

Matud pa ni Dionson nga usa ka bakak ang pasangil gumikan kay mituman man gayud siya sa hustong lagda sa Department of Health ingon man sa Dangerous Drugs Board.