Sidewalk vendors mihangop sa plano ni Mayor Tom

Pabor na karon ang grupo sa mga sidewalk vendors sa planong clearing operation nga himoon sa City Hall ngadto sa mga sidewalk vendors sa aseras diha sa dalan Colon.

Ang Alyansa sa mga Manindahay sa Sugbo kon Alma-Sugbo nga kaniadto kanunay'ng mopadayag ug pagsupak sa mga demolisyon nga himoon karung bag-o nisuporta na sa lakang nga buot ipatuman ni Mayor Tomas Osmeña sugod karong Lunes.

Gibutyag sa tigpamaba sa Alma-Sugbo Rex Deldig nga karong Domingo sa gabii, ang iyang mga sakop nga anaa maninda sa aseras gikan sa eskena Colon ug Leon Kilat paingon na sa eskena Colon ug P. Lopez, manghipos na sa ilang mga baligya.

Matud ni Deldig kadtong mga tindera nga magpadayon sa pagpaninda diha sa aseras sa maong lugar unya sa Lunes dili na ilang sakop ug anaa na sa mga sakop sa demolition team ang paghimo og aksyon kanila.

Gipaboran sa mga opisyal sa Alma-Sugbo ang clearing operations nga ipatuman diha sa aseras sa dalan Colon tungod kay si mayor Osmeña mipasalig nga kadtong mga dugay na nga naninda sa aseras tugotan nga makabalik sa pagpaninda.

Si Deldig nagkanayon nga kon mahuman na ang clearing operations sa mga sidewalk vendors did-an na unya nga makabalik pagpaninda kadtong mga bag-o na lang nga nanindahay diha sa aseras sa Colon.

Gipatuman sa mayor ang pag-demolish sa mga stalls sa asiras sa Colon tungod sa kadaghang reklamo nga kahasol agi-an sa sidewalk niini gumikan sa kahuot sa agi-anan ilabina sa mga stalls nga nagkatag sa daplin sa asiras sa Colon.

Nagpasabot kini nga ang gidaghanon sa mga sidewalk vendors kaniadto mao na lay tugotan nga makapadayon sa pagpaninda ug ang mga kahugpungan sa mga tindera did-an na pagbutang og bag-ong mga sakop.

Nalipay si Deldig nga adunay ipahigayong clearing operations aron mahibaw-an kadtong mga bag-ong naninda diha sa aseras nga matud niya giingong gipasulod sa usa ka opisyal sa City Hall.