Selosang kapuyo ulitawo, 21, giluba sa babaye, 40

Gumikan sa pagdudang gipulihan na siya og 18 anyos nga dalaga sa iyang 21 anyos nga kapuyo usa ka 40 anyos nga babaye ang miluba sa naulahi diha sa Sitio Locanta barangay Sambag Uno ning dakbayan niadtong Miyerkules sa gabii.

Ang nalubaan mao si Manuel Caña,21, ulitawo samtang ang miluba kaniya mao ang iyang kapuyo nga si Judith German,40, parehong nagpuyo sa nahisgutang dapit.

Sumala pa sa imbestigasyon sa Homicide Section sayo nianang gabhiuna ang suspek ug ang biktima nag-istoryahanay dihang nangutana ang suspek kalabot sa 18 anyos nga dalagang ilang silingan.

Giingong nagduda ang suspek sa iyang kapuyo nga nagkulokadidang sa mas batan-ong silingan maong iya kining gisukit-sukit bisan mihimakak ang biktima hangtud nga nasinta ang naulahi.

Apan ang pagkainit sa ulo sa biktima miresulta hinuon sa pagkuha sa suspek og kutsilyo dayong hansak sa walang kilid sa lalaki duol sa ilok.

Ang biktima daling gidala sa tambalanan samtang ang suspek dali usab nga mikagiw ug ikyas palayo sa dapit.