Ang biktima nga gikaliguag bala sa kalibre 45 ug 9 mm nga pistola giilang si Alberto Navaja Jr., hingkod ang panuigon ug taga Sitio Tal-ot sa naasoy'ng barangay.
Bugtong ang tingog sa usa ka misutoy nga motorsiklo lang ang nadungog sa mga residente human sa sunodsunod nga buto sa armas niadtong gabhiuna.
Si PO2 Julius Mabunay sa Homicide Section sa pakighinabi sa Banat News nagkanayon nga sa wala pa ang hitabo pila ka minutos palang ang milabay milili ang biktima sa usa ka panimalay nga dunay wall clock ug nangutana kini kun unsay oras.
Apan pila ka gutlo human kini mibiya nagsunod nga buto sa pusil ang nadungog ug dihang ilang gisubay nakit-an nila ang biktima nga nagbuy-od na sa daplin sa dalan samtang ang dahunog nalang sa mipasutoy nga motorsiklo ang nadungog sa mga tawo.
Ang biktima nakaangkon og samad pinusilan diha sa iyang ulo, upat ka igo sa tiyan ug duha sa kilid, usa ka basiyo sa kalibre 45 ug lima ka basiyo sa kalibre 9 mm ang nakita diha sa crime scene.
Sa pakisusi ni PO2 Mabunay sa mga silingan sa biktima mibutyag nga dili kawatan ang namatay kundili magamitan lang kini og rugby gani nabilanggo na kini sa Bagong Buhay Rehabilitation Center gumikan niini .
Si Navaja maoy nahimo nahimong ika-95 nga biktima sa vigilante style killings sugod niadtong Disyembre 22,2004.