Apil karon sa mga giandam nga plano sa siyudad ang paghimong quarantine site sa kontrobersyal nga condominium sa dakbayan nga nahimutang sa may N. Bacalso Avenue sa higayon nga moigo ang bird flu dinhi sa siyudad aron maoy butangan sa mga pasyente.
Gibutyag ni City Administrator Bimbo Fernandez nga gikabalak-an karon ang posibling pagkatap sa bird flu virus dinhi sa Sugbo gumikan ning mga migratory birds nga maoy nagdala sa maong sakit nga motakboy ngadto sa tawo.
Ang Isla sa Olango sakop sa siyudad sa Lapu -Lapu maoy usa sa gitumbok nga pinuy-anan ning mga migratory birds nga moabot gikan sa lainlaing kanasuran ilabina gyud sa mga lugar nga apektado sa bird flu sama sa Indonesia, Hongkong, China, ug Thailand.
Hinuon giklaro ni Fernandez nga duha karon ang ilang piliang himuon kun ugaling pipila lang ang posibleng matakboyan ning maong sakit. Mipahigayon na usab sila og negosasyon tali sa North General Hospital sa Talamban aron maoy mo-quarantine sa pasyente nga matakboyan ning maong matang sa virus.
Nunot niini, gipadayag ni Fernandez nga gipaningkamotan ang dinaliang pagpapahawa sa mga ilegal nga okupante diha sa maong condominium aron magamit sa giplanong katuyoan.