Imbestigahon ang polis nga namarayeg sa dinakpan

Si P/Supt. Audie Villacin hepe sa kapolisan sa Talisay mopahigayon og opisyal nga imbestigasyon kabahin sa usa ka polis sa Talisay kinsa gipasangilang mipagawas sa karsel sa usa ka babayeng drug suspect niadtong Domingo sa hapon.

Ang nahisgutang polis nga gipasanginlang mibuhi ni Flor Saldua kinsa usa ka drug suspect mao si SPO3 Celso Lopez kinsa nadestino diha sa sub-station sa kapolisan sa Talisay sa barangay Lawaan.

Matud pa ni Villacin sa Banat News nga silutan ug posible nga marelibuhan si Lopez kung iyang mapamatud-an nga nakabuhat kini og kalapasan.

Sila si SPO3 Ricardo Echavez ug PO3 Renato Abellar kinsa maoy misikop pagbalik ni Saldua ug maoy mipahibawo ngadto ni Villacin kagahapon sa maong insidente.

Si Lopez namalibad kagahapon sa pakighinabi niini sa Banat News.

Matud pa ni Lopez nga wala siya kahibalo nga si Saldua usa ba diay sa nasikop ug wala usab siya sultihi nila ni PO1 Roy Lofranco ug SPO1 Ricardo Balbutin kinsa maoy mi-turn-over sa mga dinakpan.

Si Saldua, matud pa usab ni Lopez nga misulti kaniya nga mikuyog lang kini ni Rodulfo Derce ilang silingan kinsa nasikop tungod sa drugas.

Si Lopez nagkanayon nga iyang giingnan si Saldua nga dalhan og pagkaon si Derce tungod kay walay libreng pagkaon sa prisohan.

Ug namalihog siya ug papalit og usa ka kahang sigarilyo diin gihatagan niya kini og P40.00 dala nga plete.

Si Saldua mipasangil nga giparayegan siya og usa ka kahang champion blue nga sigarilyo ug panihapon ni Lopez hinungdan nga mitugot nga makauli siya sa ilang balay.