Walay hired killers dinhi sa Cebu

Gisalikway ni Cebu city mayor Tomas Osmeña ang mga tabi tabi nga pagtumaw sa giingong mga hired killers nga maoy gidudahang suspek sa mga pagpangataki nga gihimo sa pipila ka mga magpapatigayun dinhi sa dakbayan ning milabay'ng mga adlaw.

Nasayran nga unang gi-ambusan patay ang magpapatigayung si Wilson Yu didto sa Pilit, Cabancalan siyudad saMandaue niadtong miaging semana ug niadtong miaging adlaw usa ka presidente sa unyon sa napasirad-ang Atlas Consolidated Mining Development Corporation (ACMD) nga si Antonio Cuizon ang nakalingkawas sa kamatayon human usab kini ambusi didto sa Sityo Gawaygaway barangay Uling Naga Cebu sa duha ka nagmotorsiklong armadong mga tawo.

Ang mga suspetsado sa sunod sunod nga pagpang-ambush padayun pang gipangita sa kapolisan dungan ang pakisusi pagsuta sa tinuoray'ng motibo sa kremin.

Apan atol sa press conference kagahapon sa udto gipadayag ni Osmeña nga wala pa siyay nadawat nga report gikan sa kapulisan nga nitumaw dinhi sa Sugbo ang mga hired killers. Wala hinuon niya isalikway ang posibilidad niini.

Nagkanayun ang mayor nga kulang siya ug pagtuo nga nakasulod dinhi sa dakbayan ang mga giingong hired killers nga maoy giingong responsabli ning mga nahitabung kremin.