Ang Task Force Wilson nga panguluhan ni Sr. Supt. Lani O Nerez gilangkuban sa mga sakop sa Criminal Intelligence and Detection Group 7 nga maoy giingong lead agency, Regional Intelligence and Investigation Division (RIID) ug Mandaue City Police Office (MCPO), lakip sa moabag nga ahensya mao ang National Bureau of Investigation.
Si PRO7 Director Eduardo Gador nagkanayon nga ang maong task group maoy motutok sa pagsubay sa motibo, utok ug mga mamumuno sa Yu ambush-slay nga nahitabo niadtong nakalabay'ng semana.
Giangkon ni Gador nga sa pagkakaron wala pay nakuhang lig-on nga anggulo ang kapolisan aron maoy matutukan apan tanang mga mitumaw nga mga pasiunang pagduda subayon kini sa task group.
Ang kapolisan nagkara-kara niini human mismong si Presidente Gloria Macapagal Arroyo mimando aron mapadali ang kasulbaran sa maong kaso, nasayran nga si Yu usa sa mga miabag kaniya niadtong milabayng piniliay.
Hinuon si Gador sa iyang bahin mipasalig sa mga publiko ilabi na sa business sector nga masulbad nila ang maong kaso apan walay gihatag nga tagal kun kanus-a kini makab-ot