Kauban sa hitman sa Akrho nasikop sa Vice

Gitumbok nga kauban sa wanted nga sakop sa Alpha Kappa Rho nga si Arestotle Aves alyas Ares nasikop sa mga sakop sa Vice Control Section sa milabay'ng gabii diha sa eskina sa mga dalan Carlock ug C.Padilla ning dakbayan.

Ang gidakop mao si Bernabe Boro,22, ulitawo ug molupyo sa nahisgutang lugar kinsa gitumbok nga usa sa mga responsable sa kamatayon sa usa ka panday nga si Eduardo Paradero niadtong January 12, 2004.

Si Paradero kasamtangang nagkabyon sa usa ka PUJ dihang miulbo ang kagubot tali sa Tau Gamma Phi ug Akrho diha sa maong lugar ug napagan ang biktima ug namatay.

Ang kapolisan armado sa warrant of arrest gikan ni Executive Branch Judge Simeon Dumdum Jr. misikop kang Boro samtang kini nakig-inom uban sa iyang mga ka-brod sa Akrho.

Ang mga suspek sa maong kaso naglangkob nila ni Arestotle Aves, Santos "Sonny" dela Cruz, Joven Camajalan, Glenn Marson alyas Waway ug uban pa. Gawas sa gipasakaan og kaso mao ang pipila sa mga miyembro sa Tau Gamma Phi niadtong tungura sanglit giingong nagkaengkwentro ang duha ka grupo sa maong dapit niadtong tungura.

Sumala pa ni Boro nga siya maoy gipuntirya niadto sa mga sakop sa Tau Gamma Phi apan napagan lang ang biktima.

Samtang sa laing bahin si Aves duna nay patong nga P100 mil sa ulo alang sa pagkasikop niini. Si Aves dunay dili momenus unom ka mga arrest warrants nga nagpaabot batok kaniya