Anak gigulgol sa inahan

Patay ang usa ka 5-anyos nga batang lalaki human gitigbas ang liog sa iyang kaugalingong inahan diha sulod sa ilang panimalay sa Sitio Balaas, Barangay Tubod, lungsod sa Sibonga niadtong miaging adlaw pasado alas 11 sa kagabhion.

Ang biktima nga anak sa maong suspetsado giila nga si Razel Suerte, 5 anyos nga batang lalaki samtang ang suspetsado mao si Sotera Suerte, 28, inahan sa maong biktima.

Sa pakighinabi sa Banat News ni PO2 Antonio Sanchez, nasayran nga sila nakadawat og impormasyon mahitungod niining hitaboa gikan ni Celso Maravillas, kapitan sa maong barangay.

Nunot niini, ang mga kapolisan sa maong lungsod daling niresponde nga gipangulohan ni SPO3 Ramon Padilla. Diha sa crime scene, mao nalang ang ilang naabtan nga patay na ang biktima nga gikaligoan sa iyang kaugalingong dugo nga nagbuy-od sa sala sa ilang panimalay.

Atol sa imbestigasyon, nahibaw-an nga gigulgol sa maong suspetsado ang liog sa biktima ginamit ang usa ka mahait nga kutsilyo.

Ang suspetsado miangkon nga siya gayud ang mibuhat niini ug kini tungod kay ang iyang pamilya nag-atubang sa dakong problema'ng pinansyal, naproblema usab siya sa iyang bana tungod kay kini adunay daghan nga mga bisyo ug nga wala na kini uli-uli sa ilaha hinungdan nga sila naglisod og buhi sa ilang 5 ka mga anak.

Sa laing bahin, nasamdan usab sa liog ang 5 ka buwan nga anak sa suspetsado nga si Roxanne Suerte. Kini anaa karon sa Vicente Sotto Memorial Medical Center

Gidugang pa usab nga ang inahan sa biktima nawad-an og tarong paminsar gumikan sa kanerbyosa niini hinungdan nga iyang nabuhat ang maong salaud . Uban sa report ni Brenda D. Batuto