Misis gipusil sa bana

Bana nga gikatahong gibanhaan sa pagpunay og yawyaw sa iyang asawang nanukot sa halin sa gibaligyang kamote mipusil hinuon sa naulahi gumikan sa kahubog niini. Ang insidente nahitabo diha sa barangay Caliungan lungsod sa Dalaguete sa milabay'ng adlaw.

Sa pakighinabi sa Banat News kang SPO1 Gwen Consejo giila ang biktima mao si Anastacia Amancio,58, ug ang suspek mao ang bana niining si Cresencio Amancio, 56, pulos mag-uuma diha sa Sitio Caratagan sa nahisgutang barangay.

Sumala pa ni Consejo base usab sa gitug-an sa anak sa managtiayon nga si Ireneo, nadunggan niya ang duha nga naglalis gumikan kay gipangitaan sa iyang inahan ang suspek sa halin sa kamoteng gipabaligya didto sa merkado sa Caliungan.

Apan ang suspek kinsa hubog kaayo ug giingong walay napakitang halin giingong nainit sa gipanulti sa biktima sanglit nagmulo man kini nga nagsakit ang tiyan niini ug sa ilang anak nga si Ireneo kinsa gihilantan nga naglubog sa iyang lawak.

Usa ka sipang buto sa armas ang nadungog ni Ireneo ug dihang iyang gisusi nakit-an niyang naghupot pa sa kalibre 38 rebolber ang iyang amahan ug nagbuy-od usab ang nagkadugong biktima kinsa napusilan sa nawong ug milapos sa luyo sa ulo.

Daling giilog ni Ireneo ang armas apan siya hinuoy gitionan sa iyang amahan maong mikaratel siya og ikyas ug gipahibalo ang mga kabanay ug kapolisan. Hinuon wala moikyas ang suspek ug nasikop kini ni SPO1 Nicanto Centino.