NBI-7 mo-imbestigar sa anomaliya sa business office

Ang National Bureau of Investigation (NBI-7) maoy mopahigayon og imbestigasiyon kabahin sa alegasiyon nga anomaliya sa pagpalusot og mga peke nga business permit sa buhatan sa Business Permit Section ubos sa City Treasurer's Office sa Cebu City Hall.

Kini human gipahibalo ni MayorTomas Osmeña atol sa press conference kagahapon sa udto nga ang NBI-7 maoy iyang gi-tap aron mo-imbestigar sa maong binuang diha sa business permit section.

Gitug-an sa Mayor nga bisan siya sa iyang kaugalingon kumbinsido gyud nga dunay panagkunsabo sa mga kawani sa buhatan sa City Treasurer's Office sa pagpalusot og peke nga business permit.

Ang tanang mga kawani ingon man si City TreasurerTessie Camarillo ang mopa-ubos sa maong imbestigasiyon aron pagsusi sa maong binuang ug gani iyang giklaru nga apil usab siya nga mopa-ubos sa maong imbestigasiyon aron patas ang tanan.

Dili tiaw ang gibati nga kasuko sa mayor dihang napublikar ang tulo ka mga establisamento nga nasakpang migamit og peke nga business permit nga wala gyud mahibaw-i sa mga hingtungdan. Ang mga establisamento nga nabiktima sa pagpalusot og fake nga business permit naglangkob kini sa Cebu Security Agency sa may dalan B. Rodriquez, NolsieTrading sa may V. Gullas St. ug RB Car Trade sa may Salvador Labangon ning dakbayan.