Ugangan vs umagad nag-duelo

Nagtinigbasay ang ugangan ug umagad human nangahubog didto sa Sitio Datag, Barangay Maribago dakbayan sa Lapu-Lapu niadtong Martes alas 7 ang takna sa kagabhion.

Ang nangaangol giilang sila si Ernesto Bacalla, 59, biyudo sa asawa kinsa ugangan ni Wilfredo Amancio, 36, minyo ug pulos molupyo sa maong lugar.

Matud pa ni PO1 Alcistes Roxas nga sa imbestigasyon nila ni SPO2 Rolito Jomao-as ug ni PO1 Antonio Inihaw Jr. sa pakighinabi sa Banat News nagkanayon nga ang duha nag-inom sa usa ka tindahan sa nahisgutang lugar.

Tungod sa kahubog nanggawas ang daan nga pagdumot sa matag usa ug nagkasinabot nga mag duwelo. Si Bacalla mikuha og duha ka tag-as nga sundang ug giitsa ang usa ngadto ni Amancio.

Sa ilang panagbangi naigo ang ugangan nga si Bacalla sa iyang walang tiyan dapit sa atay.

Samtang si Amancio nakaangkon og samad tinigbasan sa iyang walang bukton ug sa uban pang parte sa iyang kalawasan.

Ang duha gidala sa Lapu-Lapu District Hospital apan gibalhin ra usab kini sa Vicente Sotto Memorial Medical Center tungod sa grabe nga samad nga naangkon sa duha.

Ang duha gikatakda sa kapulisan nga ikiha tungod sa kalapasan sa Artikulo 260 tungod sa ilang pag-duwelo.