Way polis gi-nominate

Mauwaw kay daw "nag-aswat sa ilang kaugalingong bangko" maong walay misuway og aplay sa mga sakop sa Cebu City Police Office aron makadawat og pasidungog gikan sa Kiwanis Club of Cebu.

Si Miguel del Gallego sa Kiwanis Club mibutyag sa mga sakop sa media kagahapon nga walay nahatagan og pasidungog ang Kiwanis sa milabay'ng Marso 2004 ngadto na sa Marso 2005 gumikan kay walay mga polis nga mi-aplay ug gi-nominate.

Sumala pa sa maong grupo posibleng mauwaw ra ang mga polis nga mangaplay sa ilang kaugalingon sanglit bati kaayong paminawon.

Usa ka taas nga opisyal sa CCPO nga dili buot magpaila mibutyag nga gawas nga makauuwaw para sa mga polis nga mangunay og aplay lahi ra gyud kun dunay grupong maoy mo-nominate sa usa ka polis.

Nunot sa napakyas nga milabay'ng tuig gilugwayan pa sa Kiwanis kutob karong Disyembre 31, 2005 diin subayon ang ilang mga natampo sa katilingban gikan sa Abril 1, 2004 hangtud Disyembre 31 ning tuiga.

Usa sa mga gipangita sa usa ka nominado mao nga kinahanglan makalapas siya sa gitawag lang og model cop ug gikinahanglang outstanding cop ang nominado diin nakahimo kini og binuhatang "beyond the call of duty."

Lakip sa mahimong i-nominate mao ang mga polis nga namatay na aron katagaan og posthumous award apan kinahanglang magsubay gihapon sa rekisitos.

Nagtuo si del Gallego nga daghang mga outstanding cop sa CCPO apan mauwaw lang sa pag-aplay.