Christmas lights way 'PS' peligro sa sunog - DTI

Giwarningan sa kagamhanan ang publiko batok sa pagpamalit og mga christmas lights nga walay markang Philippine Standard (PS) kay peligro kining makamugna og dakong sunog.

Ang maong pasidaan gihimo ni Atty. Josh Carol Ventura, hepe sa Trade and Industry Regulatory Division sa Department of Trade and Industry (DTI-7).

Matud pa ni Ventura nga imbes mopalit, itaho hinuon kini ngadto sa ilang buhatan sa DTI aron masikop kadtong mga negosyanteng abusado.

Ang buwan sa Oktobre hangtod Disyembre maoy tingkusog sa pinalitay sa mga christmas lights aron idekorar sa mga kabalayan sa panahon sa pasko.

Apan matud pa ni Ventura nga mao usab kini ang panahon nga mopahimulos ang mga negosyanteng abusado pinaagi sa pagpamaligya og dili de kalidad nga mga christmas lights.

Ang maong mga christmas lights nga walay markang PS nagpasabot nga wala mopasar sa balaod bahin sa Philippine Standard Law hinungdan nga minus kaayo kini og kalidad.

Ang maong matang sa baligya maoy delikado kaayo nga momugna og sunog sa palibot, matud pa ni Ventura.

Sa miaging tuig gatosan ka karton nga puno sa mga christmas lights ang nasakmit sa taga DTI didto sa Bohol, samtang ubay-ubay nga mga negosyanteng Sugbuanon ang giwarningan.

Matud pa ni Ventura nga basta mga electrical nga materyales siguradoon gyud nga may PS mark, kay nagpasabot kini nga nag-agi og makuti nga pagsuway.