NBI-7 nanghinaw sa mga raid batok pirated softwares

Gipahimangnuan ni National Bureau of Investigation 7 Director Medardo Delemos ang mga magpapatigayon dinhi sa ilang ginsakupan nga wala pay ronda nga gilusad ang ilang buhatan batok niining mga pirated softwares nga gigamit sa mga kompaniya.

Sumala pa ni Delemos nga duna siyay nadawat nga mga impormasyon nga dunay mga grupong migamit sa pangalan sa NBI nga nangronda sa mga estabilisamento gumikan kay mga pirated ang ilang gigamit nga software sa ilang kompaniya.

Giingong tuyo sa maong grupo nga kilkilan ang maong estabilisamentong ilang masakpang migamit og peke nga software ug walay kalabutan niini ang NBI -7.

Matud pa ni Delemos nga sa pagkakaron ang Business Software Association nga maoy 'umbrella' sa tanang mga nagbaligya og mga softwares sa mga computers wala pay reklamo nga gipadangat diha sa iyang buhatan.

Ang BSA maoy mopadangat og reklamo ngadto sa bisan unsang law enforcement units sama sa NBI, Criminal Intelligence and Detection Group(CIDG) ug Optical Media Board (OMB) kun dunay mga kompaniyang ilang masakpan ug ang mga law enforcement agencies na ang mokuha og permiso ngadto sa korte aron himuon ang ronda.

Giangkon usab ni Delemos nga kadtong mga batid ra usab sa BSA maoy makahimo sa pagsusi kun peke o dili ang mga softwares nga ilang gidudahan