Nahagbong o gihagbong sa barko? Lalaki giila na sa iyang kabanay

Human sa kapin duha ka semana nga pagkatanggong sa morgue ug gipalubong sa hepe sa kapolisan diha sa pampublikong sam-ang nailhan na gyud ang usa ka patay'ng lalaki nga nakit-ang naglutaw sa dagat sa Oslob niadtong nakalabay'ng adlaw.

Gituhoang nahagbong o gituyo og hagbong sa barko ang maong lalaki.

Ang maong lalaki giila sa iyang amahan ug uyuan nga sila si Celestino Imbang ug SPO4 Arnulfo Sanchez kinsa sakop sa Kolambugan Police. Sumala pa sa duha ang patayng lalaki mao si Allan Imbang anak ni Celestino.

Gikatahong molupyo sila didto sa Barangay Dalisay lungsod sa Aluran, Misamis Occidental.

Napalgan ang patayng lawas sa biktima diha sa kadagatan niadtong Septembre 21 ning tuiga apan walay nakuhang ilhanan sa biktima sanglit ang mga dokumento sa pitaka niini nahumod man pag-ayo sa tubig ug napapas ang mga gipanulat didto, hinuon naa pa ang salapi sa sulod niini.

Nagtuo ang Oslob police nga nahulog sa barko o ba kaha gihagbong og tuyo ang biktima diha sa kadagatan samtang naglawig ug diha na gianod sa ilang lungsod hangtud nga kini nakaplagan sa mga mananagat.

Niadtong nakalabayng semana gipalubong kini sa kapolisan gumikan kay wala pa gihapoy mianha sa ilang buhatan aron pagkuha ug pag-ila sa biktima.

Sa pag-abot sa mga kabanay sa biktima gipakawot kini pag-usab ug gipailawom dayon sa awtopsiya aron matino kun duna bay foul play ang kamatayon niini. Plano sa mga kabanay sa biktima nga dad-on kini pagbalik sa ilang lugar.