PNP alerto sa ika-2 pamomba sa Bali nga mipatay'g 25

Gibutang karon sa heightened alert ang kapolisan gumikan sa nahitabong subling pagpamomba didto sa Bali Indonesia kagahapon diin mipatay kini og kapin 25 ka mga tawo ug miangol sa kapin 100 ka tawo.

Lakip sa giisa ang alerto mao ang Central Visayas gumikan sa posibleng pagsuhid usab sa mga teroristang grupo nga mo-atake dinhi, ang New Peoples Army nga giisip sa Estados Unidos ug European Union nga terror group maoy usa karon sa nangusog sa ilang military operations sa Kabisay-an.

Si Police Regional Office 7 Director General Eduardo Gador sa pakighinabi sa Banat News mibutyag nga dihang nadawat sa Camp Crame ang nahitabo sa Bali, Indonesia gi-alerto dayon ang kapolisan sa nasud.

"Ato dayong gi-increase ang atong security para makalikay ta nga dunay mangopya dinhi kay duna na rabay grupo usab nga ga-exist dinhi sa atua,kay usahay mangatake ra na sila nga way reason ang ila makasamok lang," sumala pa ni Gador.

Si Presidente Gloria Macapagal Arroyo kagahapon mikundenar usab sa maong pagpamomba sa Bali ug mimando sa tanang security forces sa nasud sa pagmatngon ug pahugtan pa gyud ang seguridad ilabi na sa mga tourist spots.

Ang bombang miigo sa Bali gikan sa tulo ka managlahing dapit apan kining mga dapit pulos mga naa sa mga beach resorts sa Jimbaran Beach, Kuta Beach diin puno kaayo og mga turistang lakip sa kabataan nga nangaon sa ilang panihapon sa mga restaurant.

Pipila sa mga turistang nangaangol gilangkuban mga South Koreans, Hapones, Australyano ug Indonesians ug uban pang mga nasyonalidad.

Ang pagpamomba naatol nga ang Bali inanay nga nakarekober sa unang pagpangatake tulo na ka tuig ang nakalabay diin 202 ka tawo ang namatay samtang gatusan ang nangaangol, gituohang mga sakop sa Jemaah Islamiyah ang utok sa unang pagpamomba niadto.

Samtang dinhi sa Pilipinas usa sa mga init kaayong mga terror group nga milusad na dinhi og pagpangatake mao ang Abu Sayyaf nga giingong kaubanan ra sa mga JI. Apan matud pa ni Gador nga walay namonitor sa kapolisan nga mga sakop sa ASG nga naglihok karon dinhi sa Kabisay-an.