Nagtulis sa Western Union-sikop

Nagtulis sa Western Union sa Poblacion, Lapu-Lapu niadtong miaging semana nga sakop sa bangiitang tulisan nga si Danny Limutan nadakpan na gayod ug gibalhog na sa bilanggoan.

Nadakpan kini sa follow up operation nga gihimo sa mga sakop sa Special Weapon and Tactic (SWAT) ug mga sakop sa Theft and Robbery Section didto sa barangay Bankal sa siyudad sa Lapu-Lapu.

Ang nadakpan giila nga mao si Jolito Hermocelia, hingkod ang panuigon, ulitawo kinsa nadakpan kini sa panimalay niining gipuy-an didto sa nahisgotang lugar.

Ang laing kauban ni Hermocelia nga nailhang si Jonard Padriga nga sakop gihapon ni Limutan padayon pa usab nga gipangita sa kapolisan.

Positibong giila si Hermocelia sa cashier sa nahisgotang establisamento nga gitulis dihang giatubang ug hangtod na ang kauban niini si Padriga dihang gipakita usab ang hulagway niini.

Hinuon si Hermocelia nga gisukitsukit sa kapolisan hugtanong mihimakak sa maong mga alegasyon nga nalambigit kini sa maong mga pagpanulis nga nahitabo dinhi sa Sugbo.