Nagub-an og sakyanan gitulis

Usa ka babaye nga nagub-an sa iyang sakyanan gitulis sa duha ka mga lalaki nga nagbisiklita didto sa may dalan A. Soriano atubangan sa mga White Gold Parking Area niadtong milabay'ng adlaw sa alas 5 ang takna sa hapon.

Ang biktima nga si Vanessa Ochon, 22 nga lomulopyo sa 4A Saphire St. Gensville, Lahug nakuhaan og kapin sa P15 mil dihang gitulis kini sa duha ka lalaki nga gibanabana nga nag-edad og kapin na sa 20, nagsakay og bisiklita ug ang usa niini adunay dala nga kutsilyo.

Base sa gihimong imbestigasyon ni PO2 Dante Manibao, nasayran nga ang biktima nagub-an sa iyang van nga sakyanan hinungdan nga iya kining gi-parking kilid sa maong parking area.

Kalit mitungha sa iyang luyong bahin ang duha ka lalaki ug dayong deklarar og "hold-up".

Nakuha gikan sa biktima ang iyang cellphone nga mobalor og P15 mil ug ang iyang gold bracelet nga wala pa masuta ang kantidad. Human makuha ang maong mga kabtangan daling nakapadagan sa ilang bisiklita ang duha ka tulisan ug hangtud kaorn pabilin gihapong gipangita sa kapolisan sa Mabolo.