East-West Bank gitulis napud

Sa ikaduhang higayun ning tuiga natulis na usab ang East West Bank diha sa Ayala Business park kagahapon sa hapon diin upat ka mga lalaking luwan sa usa ka motorsiklo ang yano kaayong midisarma sa gwardiya ug mibuak pa sa bildong pultahan dayong kuha sa mga kwarta diha sa teller.

Ang mga suspek gikatahong wala magsuot og taptap sa nawong nga armado og pistola ug nakiglayog sa gwardiyang si Viktor Longakit dihang nailog ang armas dali usab nga nanulod ang duha ka kaubang tulisan diin usa kanila ang mibuak sa pultahang automatic lock.

Sama sa miaging pagtulis kanila niadtong Enero ning tuiga siyam ka bulan na ang nakalabay usa ra gihapon ang gwardiya nga nagbantay ug walay security camera diha sa palibot niini.

Sa unang insidente ang grupo sa napungkol nga si Rey Torres ug Danny Limotan maoy gitumbok nga responsible sa pagkahanaw sa gideklarar nga P.5 milyones nga salapi.

Apan si Criminal Intelligence and Investigation Branch Chief, pablo Labra mibutyag nga base sa gibutyag sa usa sa mga kawani nga dili mosaka sa P50 mil ra ang nadala sa mga tulisan, nahibaw-an nga sukad sa insidente sa unang pagtulis matag dunay depositor nga moabot idiretso na kini sa kaha ug magbilin lang og P10 mil matag kahera.

Nasuta nga usa ra ka kahera ang nakuhaan og kwarta sanglit dali mang nangikyas ang mga suspek nga migamit ra sa ilang mga sinina isip sudlanan sa mga nakuhang salapi.

Gikatahong nagpasad pa sa pultahan ug salog ang kwarta atol sa pag-ikyas.

Sa nadawat nga pamahayag sa East West bank sa Banat News kagahapon ilang gipasalig nga walay dakong danyos nga nahatag ang maong insidente ug mapasalamaton nga walay nasakitan sa mga kawani ug depositor atol sa insidente.

" Eastwest bank is assuring its depositors, that appropriate steps are being undertaken to protect the bank's assets and its clients against similar incidents," sumala pa sa pamahayag.

Wala isalikway sa kapolisan nga anggulong dunay inside job sa hitabo samtang gisubay na usab ang impormasyon kaniadtong dunay grupo gikan sa Mindanao nga gipanguluhan sa usa ka military type nga tawo nga nangabot dinhi sa Sugbo.

Usa sa mga suspek nga dunya gitas-ong 5'9 ngadto sa 5'10 ug susamag sudalo kun maglihok ang gihulagway sa mga testigos, samtang atol sa pag-ikyas dugay pa kaayong miarangkada ang makina sa motorsiklong TMX nga itom gumikan kay nagkurog ang drayber niini, samtang ang duha sa mga kauban niini nagpaso-paso sa dalan samtang nagbantay sa pag-abot sa polis.

Dihang nakaandar na ang motor daling misutoy ang grupo subay sa dalan Rosal St. sa barangay Camputhaw ug wala na maabti sa kapolisan.

Si Konsehal Sylvan Jack Jakosalem sa pakighinabi sa mga tigbalita nagkanayon nga duna gihapoy lapso sa seguridad sa maong bangko, gawas nga walay kamera ug usa ray gwardiya didto pa gidirekta ang tawag sa telepono sa usa ka higala ug dili sa kapolisan.

Nasuta nga kasamtangan pang mirequest ang maong bangko og dugang security systems apan wala pa kaaprubahi sa ialng head office sa Manila.