Torres, Limutan groups naghiusa?

Ang duha ka pundok sa mga armadong tulisan nga gipangulohan kanhi sa duha usab ka banggiitang mga tulisan nga sila si Rey Torres ug Danny Limutan naghiusa ug mao kini ang mihimo og mga nagkadaiyang pagpanulis sa pipila ka mga establisamento sa Sugbo.

Mao kini nahipos nga kasayuran gikan sa pipila ka sakop sa kapolisan kinsa nagpadayon na karon sa paghimo sa ilang operasyon sa pagsikop sa maong pundok.

Nahibaw-an nga si Rolando Villanueva nga maoy nangulo sa pundok nga sakop ni Torres ug si Dorotheo Imperial usab ang nangulo sa mga sakop nga gipangulohan kanhi ni Limutan.

Nagtuo ang kapolisan nga ang duha ka pundok maoy nagpasiugda sa nagsunod-sunod nga mga tulis sa RCPI ug AA Commercial sa dakbayan sa Mandaue.

Gituohan usab nga ang maong pundok mao usab ang nagtulis sa usa ka tindahan ug ingon man money changer sa dakbayan sa Sugbo ug ingon usab sa bag-ong pagpanulis nga nahitabo sa dakbayan sa Lapu-Lapu.

Ang mga kuwerpo sa kapolisan sa nahisgotang mga lugar padayon na karon nga naghimo sa ilang operasyon alang sa pagpaniid sa mga tagoanan sa maong pundok aron sa pagdakop niini ug pagbalhog sa bilanggoan.