1 trak marijuana gipanglarot

Gibana-banang usa ka trak nga mga marijuana ang gipang-ibot sa kapolisan sa Badian gikan sa Sitio Linot-ot,barangay Sohoton lungsod sa Badian niadtong milabayng Sabado sa kaadlawon.

Ang maong mga marijuana mikabat ngadto sa 17,000 ka mga hamtong na nga punuan ug 5,600 ka mga semilyang igtatanom na diha sa maong dapit.

Si Inspector Costan Orbigoso sa pakighinabi sa BANAT News mibutyag nga anha gitanom ang marijuana sa luna nga gipanag-iya sa gobiyerno nga layo sa kabalayan.

Ang Sitio Linot-ot matud pa ni Orbigoso dunay lima ka kilometro gikan sa sentro sa barangay Sohoton ug bukiron kini nga mikabat sa kapin tulo ka oras nga pagtangas sa kalasangan.

Sumala pa ni Orbigoso usa ka "A1" nga impormasyon ang ilang nadawat kalabot sa maong dapit nga matud pa niya wala gani maapil sa mga barangay nga notado na kaayong tamnanan sa mga marijuana sukad pa kaniadto nga ilang gibantayan.

Matud pa niya nga ang mga barangay Patong, Basiao ug Basak maong gibantayan na kaayo sa kapolisan sukad pa niadtong tuig 80 apan ang Sohoton karon pa nahitabong dunay tanaman nga nataho ug mitumaw nga positibo kini.

Wala hinuoy naabtang nananom niini apan gikatakda kining sunogon karong adlawa diin saksihan ni Badian Mayor Carmencita Librando Lumain ug mga opisyal gikan sa Cebu Provincial Police Office.