KULATADONG BATA MILUBA SA INAHAN

Wala na makaagwanta sa pagpangabuso ang usa ka trese anyos nga batang mireklamong kanunay'ng dagmalan ug maltratuhon sa iyang inahan diin gamitan pa og kadena kun silang magsuon latuson maong "giunhan" na lang niya og dunggab ang iyang inahan kagahapon sa buntag.

Ang bata giilang si Maynard (apelyedo gipugngan)13, molupyo sa Barangay Tejero kinamaguwangan sa tulo ka magsuon, samtang ang gidunggab niini mao ang kaugalingong inahan nga si Susan (apelyedo gipugngan) 34, minyo pulos molupyo sa maong dapit.

Sumala pa ni SPO1 Jay Yballe sa pakighinabi sa Banat News subay sa gibutyag sa mga silingan ug sa suspek nga kaniadto pa ginadagmalan sa biktima ang bata. Usahay gapuson og kadena ang suspek ug mga igsuon niini kun makasala nga mao usab gamiton sa pagbunal kanila.

Gikatahong kagahapon sa buntag giapas sa biktima ang suspek diha sa Gothong sa Pier Area gumikan kay nahibaw-an niining naghingos na usab og rugby ang suspek, dihang iyang naabtan gipapauli kini.

Giingong gikasab-an pag-ayo sa biktima ang suspek ug dihang mokuha na unta usab kini sa kadena nianang higayuna daling mikuha ang bata og kutsilyo diha sa kusina ug giunhan pagtampok ang likod sa inahan.

Miabot pa sa gawas sa ilang balay ang panaglayog sa duha hangtud nga gibuwag sa mga silingan ug daling gidala sa Cebu City Medical Center ang biktima ug gidakop usab ang bata sa kapolisan.

Nasuta sa Homicide Section gikan sa suspek nga nahadlok kini nga gamiton ang kadena aron ipanghapos kaniya maong giunhan sa bata og dunggab ang inahan.

Dugang pa ni Yballe nga gibutyag sa mga silingan nga kanunay'ng magsugal ang biktima ug grabe usab kaayong makadisiplina sa iyang mga anak. Ang suspek kasamtangang gitanggong sa kapolisan ug gipaabot nalang ang inahan niini kun mopasaka ba kini og sumbong.