2 biktima sa pamusil

Duha ka insidente sa pagpamusil ang nahitabo sa nagkalahing dapit sa Sugbo niadtong Huwebes.

Sa lungsod sa Carcar, usa ka babaye naangol sa pinusilay samtang nagsakay og traysikol nga nagdagan padulong sa barangay Ocana sa maong lungsod.

Ang biktima nga nasamdan sa tuong paa giila nga si Sheryl Dayunot, 27, minyo og molupyo sa naasoy'ng dapit samtang ang suspetsado nga nadakpan sa kapolisan sa maong lungsod mao si Melchor Larumbi, ulitawo ug molupyo sa Bolinawan, Carcar.

Suma pa sa imbestigasyon, ang suspetsado nga gituohang nakainom nga nagbarog sa tunga sa dalan pasado alas dos sa hapon, mipara og traysikol nga gisakyan sa biktima. Sanglit wala kini pasakya ug gisiyagitan sa drayber nga "Tol, puno na kaayo!" mikuha si Larumbi ug pistola ug kalit nga gipaboto hinungdan sa pagkaangol sa biktima.

Sa laing bahin, usa ka lalaki ang nakaangkon og samad pinusilan sa iyang tuong bukton didto sa Barangay Sam-ang, dakbayan sa Toledo.

Si Jessie Emnace, 31,minyo ug molupyo sa nahisgotang dapit gipusil sa wala mailhing tawo samtang nagpahuway sud sa iyang panimalay.

Si Emnace nagkanayon nga ang nipusil kaniya mao ra ang tawo nga mitigbas kaniya pipila na ka tuig ang milabay.

Ang mga biktima kasamtangang giatiman sa Vicente Sotto Memorial Medical Center.